KASAYSAYAN

Taong 1975, nagsimula ang Matanglawin bilang isang mosquito press noong panahon ng batas militar ni Marcos. Sinisingit ang isa hanggang dalawang pahinang isyu ng Matanglawin sa mga libro sa silid-aklatan at dito tagóng ipinapakalat ang mga balitang kumikilatis sa mga karumal-dumal na pangyayaring umiiral sa lipunan.

Makalipas ang ilang taon, kinilala na rin ng Pamantasang Ateneo de Manila ang Matanglawin bilang isang pormal na organisasyon at publikasyon. Naging mas malawak ang sakop ng Matanglawin sa paghahatid ng balita at sa gayon ay nagkaroon na rin ito ng isang matibay na pagkakakilanlan bilang
pahayagan.

Sa kasalukuyan, nananatiling matatag ang pahayagan ng Matanglawin at patuloy itong sumasabay sa agos ng panahon. Isa ito sa mga katangiang dala-dala ng Matanglawin dahil mula pa sa pagkatatag nito hanggang sa ngayon, hindi natinag ang pahayagan sa kahit anumang unos bagkus ay nag-iiba ito ng anyo kasabay ang mga pabago-bagong hamon ng lipunan.

TANAWIN

Mapanghamon ang ating panahon. Kailangan ang mga matang nangangahas tumitig at sumuri sa paligid. Kailangan ang isang tanglaw sa katotohanang naiipit sa gitna ng dilim kung saan laganap ang pambubulag at pagbubulag-bulagan. Kailangan ang mga kuko ng lawing tutulong sa pagdaragit ng mga dagang ngumangatngat sa yaman ng bansa at ahas na lumilingkis sa dangal at karapatan ng mga maralita. Kaya’t ang Matanglawin ay bumabangon upang tumugon.


Tumutugon ang Matanglawin: una, bilang pahayagan ng malaya at mapagpalayang pagpapalitan ng kuro-kuro tungkol sa mahahalagang usaping pampaaralan at panlipunan; at ikalawa, bilang isang kapatiran ng mga mag-aaral na may malalim na pananagutan sa kaniyang bayan. Ang Matanglawin ay hindi nagsisimula sa wala. Saksi ito sa nakatanim nang binhi ng pagtataya at pagkilos ng ilang Atenista. Subalit hindi rin ito nagtatapos sa simula. Hangad nitong diligan at payabungin ang dati nang supling, at maghasik pa ng gayong diwa sa higit na maraming mag-aaral. Hangad din nitong ikalat ang gayong diwa sa iba pang mga manghahasik ng diwa at sa iba pang mga pamayanang kinasasangkutan ng mga Atenistang kumikilos palabas ng kampus.

TUNGUHIN

Sa adhikaing ito, isinasabalikat ng MATANGLAWIN ang mga sumusunod na sandigang simulain:

1. MAGING matapat at matapang sa paghahanap at paglalahad ng katotohanan: katotohanan lalo na ng mga walang tinig.
2. BIGYANG-DAAN ang malaya, mapanuri, at malikhaing pagtatalakayan: kabilang na ang kritisismo ng mga mag-aaral hinggil sa mga usaping pangkampus at panlipunan.
3. HUBUGIN ang mga kasapi sa pamamagitan ng pakikisalamuha sa mga tao lalo na sa mga anakpawis, pagpapanday para sa isang masinop na pananaliksik at pagpapahayag, at paghahasa sa malalim na pagninilay upang maging mabisang tagapagpairal ng pagbabago sa mga di-makatarungang balangkas ng lipunan.
4. TUMAYO bilang isang aktibong kinatawan ng Pamantasan para sa ibang paaralan at sektor ng lipunan.
5. ITAGUYOD ang diwa at damdaming makabansa lalo na sa pagpapalaganap at pagpapayaman ng sariling wika.
6. PAIGTINGIN ang kamalayang pampolitika sa Ateneo sa paraang mapayapa subalit mapanghamon, at may pagkiling sa mga dukha bagaman walang isang ideolohiyang ibinabandila.
7. IBATAY ang lahat ng gawain sa papasulong na pananaw ng pananampalatayang Kristiyano na sumasamba sa Diyos na gumagalaw sa kasaysayan, kumakampi sa katotohanan, at may pag-ibig na napapatupad ng katarungan.

MGA PROYEKTO

ZINE

Madalas, kada unang semestre, mayroong maililimbag na bagong regular isyu. Pinaikli mula sa salitang “Magazine”, Ang Zine ay isang seryosong isyu na nagtatalakay tungkol sa kasalukuyang kalagayan ng pamantasan at ng bansa.

TANGANGLAWIN

Taliwas sa regular Zine, ang tema nito ay lampoon o pampatawa sa mga mambabasa upang mas lubos na maintindihan at mahimok ang pansin ng mga mambabasa. Tinatalakay ng Tanganglawin ang mga panlipunang at pampantasang suliraning kinahaharap sa panahong habang ito ay ginagawa.

Tanglaw Film Festival

Isang taunang film festival ng Matanglawin na nakatuon sa mga pelikula at pagtatanghal ukol sa karapatang pantao. Matapos ang mga palabas, kadalasan itong sinusundan ng talkback session upang palalimin ang talakayan ukol sa paksa. Bukas ang Tanglaw sa paglahok ng lahat ng Atenista

Tindig Loyola

Ang Tindig Loyola ay isang taunang inisyatibong handog na Matanglawin Ateneo upang bigyang pokus ang taon-taong halalan para sa mga susunod na pinuno ng Sangguniang Ateneo.

Halimhim

Ang Halimhim ay isang taunang pagdiriwang na isang kumpol ng mga talakayan at diskusyong naaayon sa kasalukuyag hinagpis ng ating marhinalisadong sektor. Layunin nitong magpamalas ng mahahalagang karanasan ng ating mga sektor at bigyang larawan sa pamamagitan ng mga karanasan ng mga tagapagsalita

Mata-Arte

Isang online serye ng editoryal na sining na nakatuon sa obrang tumatalakay sa mga isyung panlipunan. Binubuo ang MataArte ng mga gawa mula sa mga editorial cartoons hanggang sa mga short-form videos. Bukas ang lahat ng miyembro na magsumite ng kanilang akda para sa seryeng ito.

MATANGLAWIN (T.P. 2024 - 2025)

ANG PATNUGUTAN

L. Arevada

Punong Patnugot

R. Brioso

Katuwang na Patnugot

C. Perez

Nangangasiwang Patnugot

J. C. Acedillo

Ingat-Yaman

C. Del Rosario III

Patnugot ng Sulatin at Saliksikan

J. Semilla

Patnugot ng Sining

J. Evora

Patnugot ng Disenyo

C. Ocampo

Patnugot ng Teknolohiya

B. Frago

Tagapamahala ng Social Media

T. Tomaneng

Tagapamahala ng Social Media

J. Gamboa

Tagapamahala ng Pandayan

C. Dasalla

Tagapamahala ng Proyekto

MGA BAGWISAN

SULATIN

Ang Bagwisan ng Sulatin at Saliksikan ang nagsusulat ng mga artikulo at iba pang uri ng panitikan (tula, pananaliksik, satira, atbp.) para sa website at mga naililimbag na isyu (regular at lampoon). Nagsasagawa rin ito ng mga coverage sa loob at labas ng Pamantasan alinsunod sa napagpasyahan ng Patnugutan.

SINING

Ang Bagwisan ng Sining ang lumilikha ng mga dibuho, kumukuha ng mga larawan, gumagawa ng mga bidyo, at nagsasakatuparan sa lahat ng likhang-sining para sa mga naililimbag na piraso ng likha sa website at mga isyu (regular at lampoon)

DISENYO

Ang Bagwisan ng Disenyo ang naglalapat, sa mainam na paraan, ng nilalaman ng mga naililimbag na isyu ng Matanglawin. Kasama rito ang pagsasaayos ng mga materyales na kinakailangan para sa pananalastas ng mga proyekto, anunsyo, naililimbag na posisyon at opinyon, at iba pang impormasyon.

PANDAYAN

Ang Bagwisan ng Pandayan ang nangangalaga sa kapakanang pangkakayahan ng mga miyembro ng Matanglawin. Binubuo at sinasanay nito ang mga miyembro sa pamamagitan ng mga angkop na programa at proseso ng ebalwasyon. Inaasikaso rin ito ang mga papeles na may kinalaman sa pagsasagawa ng mga programa at proseso ng pakikipag-ugnayan sa mga opisina at kagawaran ng Pamantasan.

PROYEKTO

Ang Bagwisan ng Proyekto ang nagsasakatuparan sa mga programa at proyektong nagpapalaganap ng Tanawin at Tunguhin ng Matanglawin sa loob at labas ng Pamantasan at publikasyon.

SOCIAL MEDIA

Ang Bagwisan ng Social Media ang namamahala sa pagsasaayos at paglilimbag ng mga artikulo, anunsyo, at iba pang impormasyon sa website at social media accounts (Facebook, Twitter, atbp.) ng Matanglawin. Sila rin ang makikipag-ugnayan sa mga Bagwisan ng Sining at Disenyo para sa pagpapaskil ng mga publication material (artikulo, anunsyo, atbp.) na nangangailangan ng sining.

TEKNOLOHIYA

Ang Bagwisan ng Teknolohiya ang pinakabagong bagwisang inilunsad upang pamahalaanan ang lahat ng didyital na serbisyo ng Matanglawin Ateneo. Hawak ng bagwisang ito ang pamamahala sa website ng publikasyon at sa paglalabas ng malikhaing webpages tuwing mga espesyal na proyekto ng Matanglawin.
MATANGLAWIN

(02) 8426 6001 lokal 5449
Matanglawin, Silid-Publikasyon (Blg. 201-202), Manuel V. Pangilingan Center for Student Leadership, Mga Paaralang Loyola, Pamantasang Ateneo de Manila, Katipunan Avenue, Loyola Heights, Lungsod ng Quezon 1108.

© Matanglawin Ateneo 2025. All rights reserved.
Buhayin ang kwento ng malayang Pilipino.
ABOUT
CONTACT US
Thank you! Your submission has been received!
Oops! Something went wrong while submitting the form.