51 taon na ang nakalipas mula nang ipinahayag ng dating diktador na si Ferdinand Marcos Sr. ang Proklamasyon Blg. 1081 na naglagay sa Pilipinas sa ilalim ng Batas Militar. Ang rehimeng Marcos—isa sa pinakamadilim na yugto sa kasaysayan ng bansa—ay nagdulot ng libu-libong lantarang pagpatay, militarisasyon, karahasang dulot ng militar, at malawakang paglabag sa karapatang pantao. Ang gayong paniniil ay patuloy na nagdudulot ng hindi mapapatawad na paghihirap sa mamamayang Pilipino.
Sa kabila ng malubhang pagkasala sa bansa, patuloy ang pagtalilis ng administrasyong Marcos sa kanilang pananagutan at pagbabaon sa limot sa lahat ng alaala ng kanilang kasakiman at kawalang-hiyaan. Ang pagwawagi ni Ferdinand “Bongbong” Marcos Jr. bilang Pangulo ay nagpapatibay sa gayong layunin sa pulitika, lalo na’t binigyang-daan ito ng lantarang pagbaluktot sa kasaysayan at sistematikong pagkalat ng maling impormasyon. Pilit na isinusulong ng mga Marcos ang kanilang mga naratibo nang siyang malunod ang tinig ng oposisyon na patuloy ang pangangalampag para sa katotohanan at katarungan.
Isang malinaw na pagbabanta ang pagbabalik ng mga Marcos sa pinakamataas na posisyon ng kapangyarihan sa bansa sa pagtanaw sa karapatang pantao, kalayaan sa pamamahayag, at pag-aalala sa mga karahasang dinulot ng Batas Militar. Ang kanilang kasanayan ng pagpapabayang kriminal at kagila-gilalas na pagmamalabis ay sumasalamin sa mga aksyon ng administrasyon ng mga Marcos, lalo na sa kanilang pagbibigay-prayoridad sa mga internasyonal na biyahe at maging sa mga fashion show sa Malacañang—habang ang mga presyo ng mga bilihin ay patuloy na tumataas, at ang pang-aabuso sa mga aktibista, mamamahayag, at tagapagtaguyod ng mamamayang Pilipino ay patuloy na umiiral. Bukod dito, ang pag-pokus sa aspektong administratibo, pinansyal, at lehislatibo ng Maharlika Investment Fund, MATATAG educational curriculum, at confidential funds ay nagbubunyag sa maliwanag na kultura ng katiwaliang malalim nang nakabaon sa kasaysayan ng bansa.
Bagaman laganap ang mga ganitong lantarang pang-aapi, maraming Pilipino ang patuloy na nabubulag ng mga maling naratibo na ipinapakalat ng mga Marcos. Marami ang pinipiling limutin ang pagmamalupit na naranasan ng mga Pilipino sa ilalim ng rehimeng Marcos Sr.—at ngayon ay nagbubulag-bulagan din sa mga patuloy na nagdurusa sa ilalim ng administrasyon ni Marcos Jr.
Sa gitna ng patuloy nilang paniniil at pang-aapi, walang pagmamaliw ang lumalakas na panawagang kilalanin at alalahanin ang mga kasalanan ng mga Marcos. Ang mga sugat na kanilang iniwan sa ating lipunan ay patuloy na mababakas sa estado ng ating bayan. Hanggang ngayon, hindi pa rin nakakamtan ang katarungan para sa hindi na mabilang na mga Pilipinong nakitil ang buhay at hindi na muling mababalik pa.
Patuloy na tumitindig ang Confederation of Publications (COP) ng Pamantasang Ateneo de Manila (HEIGHTS Ateneo, Matanglawin Ateneo, at The GUIDON) laban sa malawakang pagbabaluktot sa kasaysayan at sapilitang pagtanggi sa mga karahasan at inhustisyang idinulot ng Batas Militar. Ang hindi paglimot sa kasamaan, katiwalian, at karahasan ay malinaw na pagtutol sa kasalatan sa pagkilala ng mga alaala ng Batas Militar.
Ang mga pahayagan ng Pamantasan ay naninindigan kasama ang mga biktima at nagsusumikap na makamtan ang katarungan para sa kanilang mga alaala at naratibo. Kinakailangan din ng ating kasalukuyang kalagayan ng lipunan ang mga Pilipinong patuloy na magsisikap na ikuwento at ipasa ang mga karansanan ng mga biktima ng Batas Militar sa iba, lalo na ang siyang mga hindi pa naibabahagi sa nakararami. Sa pamamagitan ng ganitong pagkilos, patuloy nating nilalabanan ang malawakang pagkalat ng maling impormasyon at naratibong sumisira sa epektibong diskurso. Sa kabila ng mga pagbabago sa labang ating kinasasangkutan, ang pagtindig para sa katotohanan at katarungan ay patuloy na mananaig, ano man ang mangyari.
Kaya't ang mga sakripisyo ng mga nakibaka para sa kalayaan at katarungan ay hindi kailanman malilimutan—mula noon at ngayon. Kaakibat ang COP sa lahat ng mga magigiting na nagtatanggol, hinahanap, at lumalaban para sa katotohanan at hustiya. Patuloy tayong makikibaka upang labanan ang banta ng hene-henerasyong pang-aapi, hindi lamang para sa pag-alala lamang nito.
Sa aming patuloy na pagtindig at pagpapamulat, patuloy ang COP sa pag-alala ng mga karahasan ng nakaraan, pagbalita ng nagpapatuloy na pang-aapi sa bayan, at paghimok sa ating mga mambabasa na makilahok sa paglutas ng mga isyung humahadlang sa bansa upang managot ang mga naghahari-harian at makamtan ang katarungang karapat-dapat para sa mamamayang Pilipino.
#NeverAgain #NeverForget
